Plesion > Kinders vat Hande

Kinders vat Hande

Poppies vat hande, konsertina-kinders, noem dit wat jy wil, maar hierdeur is die lidmate van ons Kerk, klein en groot, almal kinders van God, gedwing om kreatief besig te wees en saam met mede-gelowiges van regoor die land heen, hande te vat en saam aan ’n projek van die ADV, RATA Maatskaplike Dienste en die Bybelgenootskap te werk gedurende die grendeltyd. 

Die keer wel om weer op ’n ander manier bewus gemaak te word van hóé om deur Gods woord te wandel:  lees die versie, skryf of tik dit oor en plak dit op jou poppie, versier dit sou jy wou en knip dit uit.  Die die wat nog nie kan skryf nie, het hul poppies ingekleur. 

Groot vindingrykheid is deur almal aan die dag gelê om op 16 Junie die ketting wat van die poppies gemaak is, af te neem en deur te stuur vir plasing op die verskeie WhatsApp- en Facebookgroepe.  Nie eens die wind of koue kon die geesdrif demp nie.  Sommige poppies het van die kerk se deur na die straat gewapper, ander in die binne howe, party binne-in die kerk, al om die banke, die preekstoel en daar was selfs die wat in die konsistorie ’n draai gemaak het.

Die NHSV-lede gaan die uitstaande tekste op hul eiesoortige kreatiewe manier op poppies skryf.  Hulle kettings sal heel gepas op Vroue-dag, 9 Augustus aan almal gewys word – ons kan nie wag nie!

Elmien Botha, Skriba van die ADV sê dit was vir haar nogal groot pret om die Konsertina-kinders te maak!!!  Die versies wat sy ontvang het om op die mannetjies te skryf was weereens vir haar ‘n openbaring: “ek lees al lewenslank die Bybel en verbeel my ek het al alles in die Bybel gelees!! Dan skielik kom jy op verse of  gedeeltes af wat jy nog nooit gelees het nie!!!  Weereens ‘n bewys dat ons meer tyd met God se Woord moet spandeer!!!”  en Hans van der Merwe, ’n Kommissielid van die ADV sê Spreuke was vir hulle ‘n herinnering van Bybelse waardes wat so maklik deur die wêreld verwaarloos en geïgnoreer word ten gunste van wêreldse dinge.

Maak nie saak watter gevoelens dit by jou ontketen het nie, ons almal het weer iewers daai een versie raakgelees wat ons herinner dat ons almal, maak nie saak van ons ouderdom, geleerdheid, intellektuele of liggaamlike vermoëns, kinders van God is en elke liewe dag afhanklik van Sy genade is, maar net so verseker is van Sy oneindige liefde vir iedere een van ons.

Mag ons dít nooit vergeet nie en deur ons barmhartigheid aan ander, Sy liefde aan die wêreld uitleef.

Skakel na meer foto’s  hier

Wilna Gates

081 524 5195

wilna.gates@gmail.com
ADV Kommissie

#skepmoed

1) Kies die skrifgedeelte/s wat julle gaan skryf hier  Skrifgedeeltes

2) E-pos die gekose skrifgedeelte aan:  diens@diakens.co.za

3) Maak seker dat die e-pos die verantwoordelike persoon se besonderhede bevat.